காதல் மட்டும் . . .

உன்னவளாய் இருக்கையிலே 

உன் தாயுமாய் உணர்கிறேன். . 

தலை கோதும் விரல்களை 

நீ அழுத்தி பற்றும் நொடி 

விளக்கி விடுகிறது 

ஆயிரம் காவியங்கள் விளக்க முடியா  காதலை!!

****************************

கீதம் அகன்று வெறும் வரிகளாய் நீளும் பாடல்களும். . 

வெறும் வினாடிகளின் நீட்சியாய் நாட்களும். . .

கனவுகளற்ற மஞ்சள் வெயில் மாலையும். . .

அர்த்தமற்ற வார்த்தைகளின் தொகுப்பாய்  கவிதைகளும். . .

உள்மனதில் ஒட்டாமல் உதட்டோடு உறவாடும் புன்னகைகளும். . 

மழை நனைத்த ஒரு வழிப் பாதையில் எண்களின் நினைவுகளும். . .

உன்னை நீங்கிவிட்ட 

என் அடையாளங்கள்!! 

*************************************

பிரிந்து போன உன் நினைவுகள் 

தினம் கண்களுக்குள் வந்து கொண்டுதான் இருக்கின்றன

கனவுகளாய் அல்ல

கண்ணீராக. . 

*********************************

உன்னில் நான் 

காதலாய் இருக்கிறேன். . .

என்னில் நீ 

கவிதையாய் இருக்கிறாய். . .

************************************

பல நேரங்களில்  நாம் பேசுவதில்லை. . 

காதல் மட்டுமே பேசுகிறது. . .

*************************************

பேசாத வார்த்தைகளைக் கூட

கவிதைகளாக்கி விடுகிறாய். .  .

'என்னதான் செய்கிறாய்?' என்றால்

அப்பாவியாய் சொல்கிறாய் 

காதலைத் தவிர 

நான் ஒன்றும் செய்யவில்லை என. . 

***************************************